تبحيرت أولاد الحومة

تبحيرت أولاد الحومة كيف لحمة الكرومة متاكلة و مذمومة , تبحيرت أولاد الحومة برشا جوا و نحسة علينا كيف زيارة البومة ...هل أتاكم حديث عّم صطوفة ؟ المشلغم صاحب سيارة السطافات؟ الي يخاف على اولادوا و ميخافش على أولاد الناس , الي على الفرنك يرمي روحوا معلابالوش , بودلاعة راكز الشيشة و ميهموش , عليه المازوط و الراس بخمسة يبرمج على كيفوا  , يتربع في قهوة ولد شهلة يحكيلك على السخانة و الناس المتشخلعة في البحر , يذكر أولاد الحومة بهّمهم , يمسح العرق و يقول " أيا تعرفوش كيفاش أنتوما أولاد حومة و خير مالبراني أتوا نهزّ أولادي و كل واحد يجيب خمسية بركة " من الفرحة فما شكون يعدي سهرية للصباح و فما شكون يروح و يفيق في الصباح العينين مدعمشة و الفم شايح و كيف مايقولو ناس بكري " من الفرحة بالجنة بّص فوق النعش " يهزّ أكالمنشفة على ظهرو و دبوزة الماء على العينين يجي عمك سطوفة "أيا ازربونا أش هالنهار الازرقٌ " ثنية كاملة يعديها يتثاوب يوصلوا للبحر يهبط الغشاشر و يتفاهموا على وقت المرواح , 17 راس في بحر لا والي لتالي من التعب يرتاحوا تحت الكراهب في الباركينغ و خلي عاد كان لقاهم واحد من الحومة ...معليناش الصغيرات هاذم ميكسابوش مليم أزرقٌ , أذاكا علاش أولاد الحومة يبشطروا الدخان , أولاد الحومة يعملوا عركة على خاطر نفس سيقٌارو و خلي كان واحد شرى حاجة ياكلها , أولاد الحومة كيف يجوعوا يتعلموا النطرة ,أولاد الحومة يبراكوهم , و خاصة اولاد الحومة يتسيبوا في عرض البحر و لا من يسأل عليهم , عمك صطوفة كيف يروح برأس ناقص ميهموش لا من شاف لا من درى , أولاد الحومة كل صيف هكا , أولاد الحومة على خاطرهم محروهين , أولاد الحومة ينحرفوا , أولاد الحومة ضيعوا منّا 
أنا تصدمت كيف شوفت أولاد حومتي هكا ؟؟؟ وأنتي زعمت أولاد حومتك هكا ؟؟؟