عسلامة و من غير لغة تحذير و هام جدا و مقال يمنع من دون سنّ 16 سنة في الحقيقة موش حفاظ على الهوية و الاخلاق أو خوف من القانون التش فش الي عملوه ربع ساعة التالي ماللخر عندي مشكل في توظيف الكلام السفاهة و بصريح العبارة
مازلت جديد في عالم البوغسفير
مانطولوش و مانزيدوش و نحاولوا نحكوا في موضوع التدوينة و نتجنبوا النقاشات الثانوية كيف ما صار في ثورة بلاد شمال افريقا من شغل و كرامة وطنية الى نقاب و لحية و رضي الله عنه ,فيلم يصور رّبي و المس بالمقدسات و هات ماكالاوي و كاينوا لا جرا و لا صار , كيف تشوف الغلطة منّا أحنا على خاطر بسهولة ناس ريقٌتها سايلة على كرسي تفتن و تروج و تحرض عادي مستانسين كيف ما أي دولة , مشكلتنا لاهين في ساك بمليون متاع سليمة , لاهين كان قلت سبحان الله برشا مراة قداش من حسنة باش تربح, لا هين في فولان عازقٌوا و لا صايم , لاهين في شكون كرّزة أكثر حمدي المؤدب و الا سليم الرياحي متاع توا , قبل بأشهر كنت نكرّز كيف نشوف جماعة تحكي في السياسة و الكلها ولات تعرف و توا الناس فمى شكون الي طوّل اللحية و ماشي فيبالوا فاق على وضعوا وفمة شكون عمل كعبة بيرة في بار و ماشي في بالوا فاهم الحرية , خلاصة القول قاعدين ندوروا في حقلة مسكرة كيف حلقة مخاخهنا, تي قبل كنا نقولوا سياسة بن علي تبسط نفودها و ماخلاتش الشعب واعي و توا ؟ 300 شهيد ماتوا ذبان عندكم ياخي ؟ خلاصة التدوينة مانيش باش نحكي على حق الشهيد و أهدف الثورة على خاطر نؤمن بالقولة متاع جلال بريك كفرة سابقة عصرها و ظاهر فيها باش تدوم فينا برشة
باش نحكي على نهار تنجم تقول شريحة من النهارات الي عديتهم توب تكريز ,ساهر نتفرج في حوار رئيس الحكومة , نفيق من النوم نلقى صحافي موقوف بتهمة التعدي على الاخلاق, نمشي باش نتظاهر مفماش ميترو , نروح نكونكتي نلقى زوز يتعاركعوا أشكون أكثر اسلامية في ندوة متاع التسامح في الاسلام توفى بواحد يغدر لاخر بكأس في راسوا في حين نسمع الي دولة,تاريخها ميفوتش الحنايا الي في حومتنا اجدادي كانوا يشربوا منها الماء,الولايات المتحدة تنجح في الهبوط لاكتشاف كوكب المريخ و احنا بلادنا صحيح اكتشفنا لكن اكتشفنا حالات كوليرا سنة 2012 , اكتشفنا أنو المرأة صحيح انسان لكن مكمّلة للرجل ,اكتشفنا منجم فسفاط في ولاية الكاف لكن باعوه لقطر , اكتشفنا انو الاسلام جاء لتونس درجين لتالي كيف ما قال رضي الله عنه,اكتشفنا أنوا منعرفوش عاصمة تركيا و طول الشريط الساحلي متاع بلادنا , خلاصة القول هوما بعدنا أسسوا دولة و أحنا أسسنا عديد الدول و عملنا ثوراة و مازلنا ما أكتشفناش القناصة , أحنا فين و الحّب فين أما تونسي بالفم و المّلا
دونت ولو انو تاريخ رديء فماش ما أولادنا يضحكوا على تفاهتنا و ينهضوا برواحهم
