ألوا , تي وينك ؟ ماشي ولا لا ؟ باهي أتوا تلقاني قدام الفاك .هيّا أنت كلّم فلان و فلتان
خلي يخلطوا , معادش بكري في ايدينا نصّ ساعة بركة .وووه ظاهر فيه معبّي ,محسوب ماستانستش عادي بركة و نورمال .أسمع ماعنديش صرّف قصلي أنت من عندك , بالله كملي خمسين فرنك منغير ما نبقى نصّرف . تي استنى خنشوف الفطور شنية ؟ أم هاني نشوف في مغرفة , زعمة كسكسي ولا مقرونة ؟ لا لا مقرونة يا خرا كعبة ياغورط زادة حتى أنا جيعان , أسمع أسمع قصّلي دوبل براس أمّك .و هكا الفطور يفّرح عند الي ما خلطش ياش يشري كسكروت , متين فرنك عند غيرو شوية صرف , ميجبوش سيقٌارو ميريت أعطيه يعبي كرشوا المسكين حتى الحلم مايشوفو في رمشة عين , زوالي غريب في بلاد النّاس لا عندو لا والي ولا تالي ليلة الي يمرض يلقي الخير في الحيوط , لامتوا من البرد و الموت ...هيّا قصيت؟ ملا نشد أنا الصفّ ,ووه هالوحلة الكلبة أرمي الغربال يركح . ياخي موش هذاكا يقرا معاك ؟ أي...أهوكا قريب يوصل أعطيه ياخذلنا هو ؟ زعمة ؟ تي أعطيه خير ملي تقعد تستنى ؟ باهي باي بركة ...تي شبيك الدزّ , يا أخت لمّ روحك عيب أحشم ...نعم بابا قتلك أخزرلي انا , هاك انت ترمي في روحك ملا حكاية , ملا معادش تشد الصف وين الاولاد برا بحذا البنات , نشّد وين نحب علاش تحب أنت تتعقرب زعمة زعمة تصلي و تعرف ربّي ؟ ملا مكحوط حتى في شدان الصّف يوقٌف ...هيّا بركة نقص من حسك هنا وصلنا , دوبل يا معّلم برّبي ,برا برا شدلنا بلاصة , أهوكا أهوكا كرسي شدوا , باسم الله , وووه ناقصة ملح تقولش علينا ناكلوا في الطبعى , أنت شوفت الياغورطة مزاللها نهارين و توفى , خير من الشّر لقيتها أنت , هاذم أول مرّة داخلين ؟ علاش ؟ تي هاو جايبون قٌازوز في هالحفرة , كول و اسكت شيهمك في النّاس ههههه ...هيّا هيّا يزيك معادش بكري , تي استى نكمل الياغورطة , هزّها في ايديك , خنغسل يدي بالله , عندك بابي مشوار ؟ خوذ,هيّا خرجنا ؟ , أه , هوا بدا يتثاوب و يحبوهم يقراوا و النوم يهزّ فيهم و يسبط حقا حقا معادش كربوناطو , نفس المعبوكة و نفس الوجوه لمّ شملهم الهّم و هزّتهم الايام ما خلت في شبابهم حتى حاجة تفرح أعطيه ياكل و ما يلقى ما يلوح , محسوب جدت عليكم مجانية التعليم عايشين عيشت اليتيم دموعهم سالت على الخدين ملقاوش صدر حنين يطفي النّار الي شاعلت الجواجي من القهر خلات الطالب يلاجي و ماهومش مأيسن و على الماجستار معملين و يقولولنا من حق الطالب التعليم
